Kada je finil Prvi svitski rat su naši judi ki su ustali živi,borili su se po svih frontah, od Galicije, Krpati do Pijave i Soče, prišli doma. sobu  su prnesli niš oružja. Najviše oružja su prnesli mornari zi Pula, Boke i Šibenika. Niš manjega oružja, samokresi, štileti, niš bal i ručnih bomb su prinesli i oni ki su bili po Karpatih i Galiciji. Sve to oružje se je hranilo i čuvalo.Na Punti je bilo niš oružja i od prije, meči, sabje, batice  ka god kubura a svaka kuća je jimila rankuni , sikire i težice ke su i te kako dobro prišle va svakon ratu.Kacaduri a na Punti jih je bilo malo, su jimili niš duplic.  Znali su delat smudac  i balini za nje od olova a više puti su duperali  kamičići ke bi bili prije zbalali mej dvimi kamici. Smudac ( barut) se je delal od sunpora, zmejenoga ujena,soli i  sušenoga belma od jaj.To je bil jako stari recept po kon su delali smudac za stare puške,kubure i puše( topi) nigdi kol Kampej.Kada su Puntari stabelili da ćeju se tlić zi Talijani su župan Keko klačić ( Frane Žic Klačić) i dožupan Mate Žic Jovanin pozvali svih bojnici ki su se tornali zi rata i va ratu izučili za časnici i podčasnici i šnjimi se dogovorili ki će bit kosiz ( kumandant)  a ki ćeju bit satnici  i ki ćeju bit trejsetači i desetači.

Dragovojno se je prijavilo tristo judi za vojsku ( svi sposobni judi na Puntu). Odredili su da će kosiz bit Jive Žic Jurina.

To je bil čovik štanj, razuman ni bil nagal a bil je odlučan, vojnu vištinu se je navadil va ratu, vil je dobro govoritit talijanski i fanj dobro nimški i vil se je šuportat, jimil je fameju i znal je zač će se borit ,kratko rečeno bil je kako stvoren za to. Satnici su bili mužeroti Vicenco Petranić , Miko Jivčić i Pere Pavlić. Zamjenici su bili Anton Vicencov, Osip Jurić i Mate Mikulin. Trejsetači su bili muškardini Pere Luskić, Mate Antičić,Pere Mikulin,Osip Osipina,Mate Mežnjar,Frane Jelenčić, Frane Mocić, Pere Popić i  niki od  Protići. Za bahorca je bil Mate Mocić.Feltruš je bil »KALCETINA« a minjal se je svaki dan. Va Bojnoj ojati su bili Župan, podžupan, tajnik, kosiz i plovan Anton Mrakovčić.Pobrojilo se je sve puške, samokresi, duplice,kubure i  stare flunte na kremen. Sve meči, sabje,štileti,bajunete i ručne bombe. Bilo je dvanajs pušak, jena puška od jenoga tira od Grge Pajdaša ku je on rabil za lovit dupini. Tri duplice. Sedan flunt, deset kubur, šest samokresi, osan ručnih bomb,deset meči i sabaj šest štileti i pet bajunet na sve to su jimili 250 bal za manliherice, šest bal za jenotirku  i dvajset bal za lovaške puške. Prvu četu ka je bila ustrojena od judi ki su se borili va Krpatih, Galiciji,Pijavi i Soči su najboje oboružili.

Druga četa va koj su bili judi zi mornarice je bila slabije oboružana  a treća četa ku su zvali rankunjeri je bila oboružana zi rankuni,sikirami i težicami. To su bili falaši I mladići ki su bili po tri rasporejeni od  Krtača do kuke i su zi teklići ( glasnik ki je hodeć nosil poruku) i kanići( glasnik ki je na konju nosil poruku) bili stalno va zvezi zi bojnin ojaton( štožer).Ojat je vaje stabelila da judi ki viju pričnu delat smudac. Objavilo se je neka svi ki jimaju sunpora prnesu va kalu Peru Mikulinu.Ujeni su delali va krušnih pećah. Kordu za delat fišketi su dobili od kav. Tamo  su dobili i niš malo dinamita.Fišketi su delali Stari Osipina, Pere Osipina Knjaka i Pere Mikulin.Priko noći su udelali kolo 150 fišketi.Dinamit su klali va tubi od urle a smudac va butije od šampanje. Jiva Tolanića i Vicenca Dunčića su poslali na goru va Senj ali va Novi zi brodon po srilivo i oružje.Šli su zet dinamit i kordu i kapčuli va Staru Bašku va mine od bauksita. Ognjeduši ( vatrogasci)  su bili Anton i Miko  Pavlić, Jive Anin, jedan od Kanajtari. Tolonarić je jimil voz zi voli i dva pune maštila vode. Ferman je bil na staroj placi, kako bi ga brzo našli va potribi. Va ognjeduših je bilo još dvajsetak starijih judi. Oni su jimili pripravjene vriće zi finin melon i sigji zi vodu ako bi talijani pucali zi topon po selu  važgali kuće.Čete su se postrojile na placi. Kosiz jin je zi belvedera Pera Šorda rekal par besid. rekal je » Judi dragovojno gremo branit naš dom i našu Hrvasku, da nan dica nebi poznova diventali šćavi. Kako ča su naši oci i dedi bil pod Vneci.Borite se puntarski važgeno i ne pustite suvraga na naše tla. Držte se one naše stare  proverbije (poslovice): NA MUKI SE POZNAJU JUNAKI A NA ZAJIKU ŽENE. Neka nas svih bog čuva. Živila Hrvaska i Punat! Sada hote za svojin poslanjen«. Na stolu sprida satnij su bile dva prekrižena štileta na ke su  svi bojnici prisegli. Najprije je prisegal kosiz, nato satnici i dosatnici i potlek bojnici svi su ponovili  »va jimenu Boga, borit ćemo se do zadnje kpje krvi za dom i Hrvasku. Nastal je muk: Nato je Petranić Zapovidil prva satnija ap tak, nato links i gerade aus pa ondat anc – cvaj judi su kako jedan šli naprid . Nato je zopovid ponovil drugi pa treći časnik. Na placi se je mogla čut muha kako leti. Žene su spravile kolo sebe dicu . Ni bilo skucanja ni plača niti zdiha. To je bil mumenat kada smo svi znali ča rabi učinit i da je samo to pravo.  Svi smo bili kako jedan čovik. Mislin da je to bil najsvečaniji mumenat va našen živjenju. Punat je ta mument bil tako složan. Tako skupa i tako odlučan. Nijedan ni mislil na korist. Ni bilo strank. Svi smo bili Puntari i svi smo bili Hrvati.  Potlek se je sve prominilo, zmišala se je korist, stranke i pulitika. Punat više ni bil nikada tako složan. Satnije su jena za drugu šle mučeć zi place, čul se je samo tvrd muški korak pobrukvanih postoli pobranih po svih bojišćih Europe.Svaki je tvrdo držal svoje oružje i orudje i mislil na to kako će ga najboje skoristit.Sve obrazi  su kako zrizane zi kamika tvrde odlučne. Ruke, tvrde težaške ruke, su tvrdo držale oružje. Ni bilo velih besid ni plahih pogjedi.

  Prva četa se je zakopala za Štradun na Puntici. Dana je bila naredba neka se na talijanski oganj ne odgovara kako se nebi  zaludu trošilo ono malo municije ku su jimili. Malo ozgora su udelali dva topa od drva i hranili jih toliko da su jih talijani mogli vidit, ma nisu mogli razpoznat,su prave ali ne.Prihrana ( pričuva) je bila rasporejena dvisto metar zada pod ulikami. Drugi bojnici su jimili straže na mestih kadi su pričekivali da bi mogli prit Talijani. Bojarna je bila va Matičikinoj kući va kali. Bojna ojat je bila va Smokovici.Kuhinja je bila na Šini dragi. Kuhalo se je va kotlu. Jedan dan kiselica drugi dan zeje a treći kisela ripa.Veli kmeti Mikulin, Mikina, Frančić, Jurić, Tolonarić i Klačić su davali meso. Sve druge jistvine i kruh su davali svi.Andre Gobo je dal fažol i kunpir a Mare zi kavane  uje i sol. Pripovidano ( zabranjeno) je bilo pit.Talijani su pucali i pucali. Trošili municiju kako ludi.Naši nisu odgovarali. Talijanski kumandant je mislil kako naši nimaju oružja.  Naredil  je atak. Petranić ki je bil iskušen va bojih je rekal neka puste Talijani na trejset koraci i neka onda svaki najprije hiti fišket a oni ki jimaju puške neka svaki svoga koga jima na turganu ( mušica) zadine. Naši su  odgovorili. Najprije su hitili fišketi a ondat su pričeli pucat zi pušak. Talijani  su popadali na zemju pričeli hitat puške, se tornjivat i dvizat ruke.Kada su naši hitili fišketi, su one ke su bile napunjene zi smudcen, eksplodirale i udelale črni dim ki je pokril fanj trsja po kon su talijani navajivali. Naši su to skoristili. Preskočili Štradun. Zarobili dvanajs Talijani.  Pobrali ča su više mogli oružja i municije i se tornali za Štradun.Talijani su jimili niš ranjenih. Nisu znali ča je zi onih dvanajs ča se nisu tornali. Zgjeda da jih je najviše presenetilo kada su naši hitili fišketi,  aš su mislili da su ručne bombe. To jih je lahko i spasilo, aš su se hitili na zemju i bale od pušak su jih  šabale (žbajale, falile). Talijanski kumandant,  kada je vidil kako je njegov naval finil,  se je odlučil  za pregovaranje. Poslal je jenoga tenenta i saldata zi bilu vijoru. Naši su jih pripejali do satnika ki je poslal kanića va  Bojnu ojat. Va  Bojnoj ojati su odlučili da ćeju pregovarat zi Talijani. Rekli su jin da se moraju Arditi potegnut va Veju.Drugi  dan neka pride kumandant na pregovori na Punat na polne.Drugi dan je prišal kumandat na pregovori. Na placi je bil stol pokrijen zi zelenin tavajolon. Bila je postrojena jena trejsetača ( svi ki su jimili oružje). Kada je prišal talijanski kumandant zi oficijali je bila udelana  obhodnja zi našin kosizon. Ondat su talijani i naši sili za stol. Zapisnik je čarkal  tajnik Zec ( na hrvaskon i talijanskon). Tajnik Zec je bil prebesidnik (prevajalac). Dogovorili su se da ćeju naši zaminjat dvanajs zasužnjenih Arditi za dva naša zasužnjena bojovnika. Talijani su jih ćapali va Nerizicah. Puntaron će ustat sve zarobjeno oružje

Puntari ćeju jimit straže po Puntu i delat red i mir. Talijani više neće napadat na Punat.

Dogovorenoga su se držali Talijani i Puntari i više ni bilo pucnjave.

Pravjali Antica Žic Mikulin, Jive Žic Jurina(sin) i Slavić Žic Barba-Ćenća. Zapisal Rado Žic Mikulin.