Nakan nikoliko dan su KRK okupirali Talijani.  Ni bilo nikakove borbe, onako kako su se dogovorili zi JUGO,  KRAJEVIMI ,GENERALI. Skrcali su se va Veji, kadi su jih  čekali zi talijaskimi bandierami / vijorami, zastavami/ i kantali su JOVINECU. Komodali su se va VEJI. Drugi dan su Talijani  hodeć šli kuntra Puntru. Na Dunatu su va Crikvi klali stražu od desetak Soldati. Na prekrižju za Veju, Vrbnik, Bašku, Kornić i Punat  su klali tešku bredu. Prišli su na PUNAT. Brzo su prišli do SOKOLSKOGA DOMA i tamo udelali kazermu /vojarnu/. Namistili su se va dvi vele barake, munjaru/ ELEKROCENTRALU/ i na kraj Punta va jenu kuću, kadi jin je bila kumanda. Za nikoliko dan su prišli karabinjeri i se naselili va Kući Andra  ORLIĆA Goba i Filanceri va kući od PERA JURIĆA na NOVON PUTU.  Naši judi jih ni su volili, ma ni bilo koristi,  bit kuntra. Po sih kućah su obisili Talijanske badiere i sako jutro dvizali BANDIERU na štandarcum Namori. Si ki su bili Namori su morali pozdravjat dvizanje i kalivanje BANDIERE,  zi dvignjenu ruku. Ki to ni udelal su ga zeli va Kvešturu i tamo uvjerili ča mora delat, ko ne želi nikoliko dan bit va pržuni. Pobrali su nikolikih komunisti va konfirnaciju va Taliju i više ni bilo nikih velih potezi. Talija je već tada jimila tržno gospodarstvo i brzo su na Punćalaj pripejali Drivene gajbice, va ke su judi sami štivali /slagali/ vrduru i frutje /voće i povrće/. Otvorile su se butige zi njihovu robu, ka je bila čudo cenija od robe prije rata. Judi su se navadili na njihove postole, košuje, vištidi i vešte, ke nisu držale više od pol godišća, ma se je druge moglo vaje kupit, aš je naša roba jimila špac /trgovinu/. Si Težaci su dobili aprovizaciju, ka ni bila slaba. Ki se je hotel zapisat va PARTITA FASHISTA, je saki misec dobil 100 lir, ča nisu bile male beći /novac/.  Zvali su jih STOLIRCI. Naši judi su jih krivo gjedali, ma su se jih bojali, aš su mislil, kako jih moru paližat /prijavit/.  Vrime je pasivalo. Si dica su hodili va Talijansku školu. Od prvoga razreda zi PRIME LETURE a stariji su se učili zi VITU ITALIJANU, ka je jenu stranicu jimila na Talijanskon a drugu preričenu /prevedenu/ na HRVASKI. Vrime je pasivali. Crikvi su naši popi jimili mise na glagolici. Saku nediju je PRETE / Talijanski pop/ jimil misu na latinskon zajiku za saldati /vojsku/. Naši komunisti su ušli va drmuni. Jedan put je nikomu Vrbančanu pofalil jedan janjac na to drugi. Šal je Karabinjeron i to prijavil. Karabinjeri su šli vidit va drmun, kadi su nestali janci i tamo našli puntarskih komunisti. PERE Franolić Barčin je jimil levorver i zapucal. Karabinjeri su odgovorili i ga ubili. Drugi su se predali. Zeli su jih va Taliju i tamo su bili va logoru.  Jeno 8 dan prije kapitulacije Italije  je kolo tristo Puntari  šlo va Badale, ke su bili obrašćene zi  gustu makiju. Tamo su ustanovili postrojbu. Oboružali su se zi onu armu /oružjem/, ča su zeli zi skladišća. Talijanon je to niki javil. Ma nisu reagirali. Kada je Talija, kapitulala /kapitulirala/, su prišli zi BADAL  na Punat. Na Puntu je bil del Talijanske alpske brigade na odmoru. Moj otac Miko žic Mikulin, ki je dobro govoril talijanski i moj stric Osip Žic Mikulin, su bili poslani neka gredu pregovarat zi KOLONELON. On je znal za  kapitulaciju. Rekal jin je neka pridu nakon pol ure. Kada su prišli su mu rekli, ako jin preda sve oružje ne oštećeno, ćeju su talijansku vojsku popejat va BARI. Pristal je na to. Nakon tri dni , kada su si talijani bili razoružani su jih zi tri vapori i trimi trabakuli va remunću, priko Visa, popejali va Bari. Kada su se tornjivali nazad jih je presrela Krstarica Delmacija, ka je bila va Njimaških rukah. Fermali su jih i pitali, čije brodi su. Maj otac ki je bil sinjalista i markoništa / radiotelegrafista/ jin je odgovoril. »Hrvatsko brodovlje,  gremo /idemo/ u SENJ«! Dali su jin pašaj/ prolaz/. Šli su kuntra Baški i kol Zečjega obrnuli kuntra Klivnu. Tamo su potopili se brodi i šli hodeć doma na Punat. Kada su prišli do Kornića su jin rekli, kako su na Punat prišle tri brodi zi ČETNICI i kako Četnici jimaju kumandu va svojih rukah. Oni su va jime Kralja i Otadžbine, poslali pozivi sin juden od osavnajs  18 do 40 godišć. Kako su oni ki su bili va POSTROJBi bili po POCUNELU, predjel nad Punton, njin nisu mogli dat poziv. Niki mladići su bili regrutirani, a š njimi su šli i niki judi, ki su bili va ORJUNI i PARTITI FASHISTA.  Oni su saku večer jimili patrole po Puntu. Naši su odlučili ćapat ZAJIK  /neprijateljskoga vojnika/, koga ćeju  zamenat /ispitat/ o ČETNICIH. Javili su se FRANE ŽIC PROTIĆ, njegov brat ANJELO i  zorman MIKO ŽIC PROTIĆ . Po noći su prišli na ŽESTIĆ. Zneli postole i ustali  va kalcetah /čarapama/  Hranili su se  va jenu prikodvoltu na Žestići. Čekali! Nakon nikoga vrimena su čuli teške pobrukvane postole od patrole. Judi va patroli su se smeli i  na sva glas ćakulali. Rekli su , kako ćeju nikih jutro osabatat. Pripravili su se. Na karabinkah su otvorili štileti (bodeži). Kada je patrola pasala blizu njih su škočili i sakomu  va patroli, uprli štilet va škinu / ledja u visini trbuha/. Rekli su cito /šutite/. Zeli jin oružje. Vezali jih i popejali jih na Pocunel. U jenoga va žepu su našli popis sih kih bi se moralo likvidirat. Na lišti su bili si ki su bili va POSTROJBI,  još desetak Kornićari i  fanj Vrbančani To je bila lišta od više od 250 judi.  Četnici su doznali, kako postrojba misli napas na njih. Zi Velebita je prišla jena skupina partizani, ka jin je morala pomoć. Va njoj su bili borci, ki su šli va partizani vaje po  talijanskoj okupaciji .  Jive Žic Klačić i Jive Žic Mikulin, Car i još desetak njih. To je bila tako rascapana vojska, sa va krpah i prikrpah /krpa prišita na krpu/ . Samo jin je oružje bilo čisto i luštro. Presukli su jih va Talijanske odore i dali su jin TALIJANSKE POSTOLE.  Po noći prije napada su ČETNICI zeli tri trabakuli,  ke su jimile motor i još tri zeli va remunć /tegalj/, ke su bile brez motora i partili za Lošinj. Zauzeli su Lošinj, tamo  su se jin pridružili »talijanski« fašisti. Pričeli su i tamo mobilizaciju. Tamo su bili više od osan dan. Kada je prišla jena veća PARTIZANSKA JEDNOTA /jedinica/ koj su se pridružili Partizani , ki su prišli na Punat zi Belevića /Velebita/. Oni su zi motornin čamcem od dr. Staneka, ki je zakasnil prit prije partence va Lošinj i zarobili su ga naši zi još šest ali sedan Vejani.  Rekvirirali su brzi kajić. Šli večer, kuntra Lošinju. Zazeli su brigi kolo lošinja i čekali on drugi del  partizanske jedinice. Jutri na svitlac  su se skrcali i vaje šli va napad. Četnici su se jeno  vrime borili, a ontrat su pobrali se ča je moglo plavat i pričeli bižat kuntra Taliji. Jedan partizan je prekinul nogu va napadu. Dva  druga  su  ga ćapali i pričeli izvlačit iz boja. Na njih su naskočili četnici i sih trih nabili na kolac /pravjala Marija Brusić Kovačica, ka je bila šef  partizanskih protiobavjštajaca/! Partizani su  zmunjenili /ploludili/, kada su čuli , kako oni na kolcu bliju i doznali ča se je dogodilo. Navalili  su kako ludi i brzo osabatali četnici.  Čudo četniki se je predalo. Čudo jih je ušlo va Ankonu i tamo se predalo Njimcem zi kimi su potlik prišli na Punat i zapalili, Sokolski dom, Školu  Namori i Juratićeve kuće. Poćapali su pedesetak judi i zeli jih va Riku. Bili su va Kazarmi dijac tri dni. Tamo su jih zamenali (ispitivalki) jedan del poslali va Hrvasku a drugi del zeli va logori va Njemašku od kuda su se retki tornali. Punat je bil osloboje.   NA PUNTI  je 1943 nakon OSLOBOJENJA od Talijani, ustanovljen je NARODNI ODBOR. Nakon nikoliko dni je bila mobilizacija sih od 18 do 36 leta starosti. Va partizani je šlo tristo Puntari, si mladići i mladi muži. Oni ki su ustali doma su formirali »STALNU STRAŽU«. Si muški od 37 pa do 60 godišć su bili va njojh. Straže su bile NA PUNTICI, kol MUNJARE, kol  TRIH KRIŽI, kol KRIŽA i na STRAŽICI. Judi su se minjali po rondi. /redu/. Kumandant je bil TONIN BONIFACIĆ, jako odlučan i pametan čovik, a kumandant mista je bil PERE Pelegrin, ki je bil mornariški oficir, va jugoslavenskoj vojski.  Na stražici je bil TALIJANSKI TEŠKI MITRAJEZ /BRADA/ ka je čuvala buku /vrata od luke/. Tamo su bile tri posade, ke su se sakih osan ur minjale. Frane Žic Protić Čelica, zi pomočnikon. Osip Žic Perićić zi pomoćnikon i Miko Žic Mikulin zi pomoćnikon. Antona Stipanića su naučili baratat jako brzo tako , bi bil i on , kada je rabilo, mitraljezac.  NJIMCI su tri puti bunbardali Punat i mitrajali po Puntu. Više puti bi bili hitali letaki, zi poruku, neka se predamo brez boja. Pisalo je ne bojte se, nijednomu nećemo niš učinit!  Naši judi su va letaki savijali tabak /duhan/ Te letaki su bile na finoj harti.  Smeli su se , kako nas oskrbuju zi hartu. Ustanovjena je bila PUONIRSKA i OMLADINSKA Organizacija. Par starijih mladići, ki su pasali vojnu obuku va KRAJEVOJ vojski, su nas učili, ča se mora udelat, kada padaju bunbe, i ča kada se mitraja.  Učili su nas prebacivanje na fronti i o puški, banbi i bajuneti. Jimili smo vježbe kol crikve na pojani. Pioniri posebno a omladina posebno. Matere su nan zašili berite na tri rogi i na nju klale zvezdu od jenoga črjenoga platna. ZVIZDU su zi šestilon štanpali moj ded Anton i Miko Kogić na hartunu i lipo zrizali. Si smo jimili drivene puške..  Formu smo nosili jedan drugomu i po njoj su si delali i šili zvizde na berite. Kada je bil probijen Front kol HREJINA, kadi je poginulo fanj naših judi a drugi su bili zarobjeni su Njimci  prišli zi PENICAMI /vrsta broda ravnoga dna sa mariniranim kamijonskim motorom/ i skrcali se na OMIŠJI. Na Punat su prišli partizani zi Omišja zi kamijunon. Rekli su komandantu neka ne pruža otpor, jer su Njimci jako, jaki i imaju troja borna kola sa topovima.  Zneli svićicu zi kamijuna, pustili kamijon sprida KRUŽERE na  klancu /srmini/ na prekrižju. Tekuć su šli kuntra STAROJ BAŠKI. Naši su se povukli na Pocunel. Bredu na Stražici su potopili va more i ju pokrili zi kamenjen. Ta breda je imala jednu  ŠABU /manu/. Ni jimala nožic, leho / već/ je bila nataknjena va  jednu  ležeznu civ /cijev/. Zbog toga ni bila prikladna za operacije na kopnu. Ostala je va moru . Jednoga dana, mi je otac po ratu, približno rekal kadi je. Sin i ja smo ronili i moj stariji sin, ki je znal štoriju je rekal , kada je prišal z mora uz kajić: »meni se pari, kako vidin kraj civi«. Si smo skočili more, očistili kamenje i BREDU potegnuli va kajić. Zeli smo ju  i savijenu va deku prnesli doma. Oprali smo ju, močili va vodi jeno par dan. Nato namazali zi naftu i klali na granel, kadi je i seda. Njimci su doznali za STALNU STRAŽU. Pozvali su TONINA Bonifacića, za koga su znali da je bil kumandant i ga pitali ča je to bilo. On je rekal, kako je to bila straža, ka je čuvala misto od lupeži, kako se nebi ča zapalilo i kako nebi, ki ne pridi prav, prišal va  misto. Dali su proglas, neka si prnesu oružje na Punćale, ki to ne udela, da će bit strijeljan. Kada su prvi prinesli puške, su Njimci jimili lištu, i sakoga črtali. Si judi su prnesli puške, ke su Njimci nakrcali na Penicu i odpejali. . Njimci su udelali garnizon va vili LUCIJI, ki je bil na kraj sela. Nisu se pačali va nikoga. Saki dan su slali patrole po selu. Jedan dan je »BORBENA GRUPA« pojačana zi partizani zi Kirije /starogrški KONTINENT/. Napala garnizon. Poginulo je desetak Njimci i jedan partiza, STIPICA.  Niki partizani su bili ranjeni. Vilu su zapalili. Trejsetak NJIMCI SU zarobili i odpejali nikamo kuntra Garici. Na Punti su se si bojali, kako ćeju Njimci zato zapalit PUNAT. Niš se više ni dogodilo. Nakon jeno tri miseci je prišla jena veća NJIMŠKA vojska. Opkolili su PUNAT i udelali Garnizon va vili KOSTARIKI, KONZULATU REPUBLIKE KOSTARIKE NA PUNTI, za vrime AUSTROUGARSKE. Borbena grupa je jako puno puti šekala /izazivala/, zapucala par tiri /opucnjeva/ i ušla. Njimci su za njimi pucali zi minohiti (minobacači). Jedan put su ubili na Kjepini dvih Njimci, ki su prišli kupit uje. Si smo ušli, na KRASE, misleć, kako ćeju važgat Punat. Vejani su hodili gjedat na SVETU LUCIJU, kako će Punat gorit.  Nika Vejanka je tancala po česti i blela: ĆE,ĆE zgorit, ta PROKJETI PUNAT«!  To su pravjale Puntarke, ke su bile oženjene va Veji. Niš se ni dogodilo. Njimci su udelali raciju, pobrali desetak judi va v Veju, od kuda su jih na intervenciju Biškupa Slebernića pustili doma. Jinglezi su pričeli bunbardat Punat. Zbonbardirali su TVORNICU TJESTENINE, ka i onako ni delala, aš ni jimila muke /brašna/. Sako drugo jutro su ontrat bunbardali  ŠKVER. Tamo su na VAŽIH  /navozih/ bile dva vele broda. Ni jih bilo zi čin finit, aš ni bilo LENJAMA /drv, dasak/, a ni bilo nunkih kalafati /brodograditelji/ aš su bili va Partizanih. Zvali smo jih mlikarice, a va Veji skujarinčići. Ontrat se je jedan dan zaplel, jedan zrakoplov va telefonske žic i pal. Pilot je bil Mrt, . Moga oca, ki je bil interpit na jingleškoj radio postaji, ka je va to vrime bila va ilegali na Dobrinjskon, neka gre vidit ča se je dogodilo.  Prišal je i ustanovil, kako su ga zakopali na grobju. Moj otac je šal nazad i nato priko »veze« va taliju i od tamo nikamo va talijanske alpe, Hitili su se zi padopbrani.  Poznova su prišli nazad na KRK i ontrat priko VEZE va taliju, pa ontrat va Bosnu ISTRU i na kraju na Krk. Bili su na Velon vrhu, do kraja rata.   Saki brod, koga su vidili , kako plovi, su javili poziciju i ontrat bi bile prišle zrakoplovi i ga torpedirale. Jeno jutro je prišla jako rano PARIZANSKA VOJSKA. Skrcali su se va VRBNIKU i ontrat hodeć prišli do Punta. Sprida naše kuće su jimili nikakovu kumandu. Ozgora mista su jimili minobacači zi kimi su pogidili, mitrajesko  najazlo /gnjezdo/ na  krovu Kostarike. Njimci su se predali brez boja.

Za vrime NJIMAŠKE okupacije je bila uspostavjena »VEZA » izmedju Ista i Krka. Zi Barija su pejali municiju i oružje za partizani. Puntari su hodili saki put i zi tovori,  luši /konji/ i na škini /hrptu/ nosili municiju i oružje do vrbanskih kunfini. Tamo su to prezimali Vrbačani i pejali i nosili do Dobrinjskoga. Oni su nosili naprid do Maltempa od kuda su ju Omišjani pejali na črišnjevo a naprid je šla na ŠMIKU i daje va Gorski kotar. Priko te veze su pejali nazad INGLEŠKE I AMERIŠKE piloti, ki su bili pogojeni nad Sloveniju i Hrvasku. Moj otac je bil INTERPIT /tumač/ i on je mislil ,kako je najmanje 500 piloti šlo zi vezu do Ista i naprid do Visa i va Bari. Niki mu je rekal, kako je priko Visa šlo nazad va Taliju, od 1943 do kraja rata, najmanje 1500 piloti. Jeni piloti, ki su bili pali va Liki su u nas pravjali, kako su se najviše bojali ČETNIKI, aš oni su sakoga zaklali. Jedan pilot, ki je bil pal va Liki i su ga našli Partizani, je zi Partizani prišal va jenu kuću. Seli su se  i jili palentu zi mlikon. Pilot je dvigal glavu i zablil, moj ćaća, fader! Si su pogjedali . On je gjedal va letrat na zidu, stal se i pričel na slabon hrvatskon švejkat. To moj ćaća. Ja njegov son /sion/. Prišal je va kuću svoje babe.  Baba je prnesla zi škafetina još letrati i on je pokazal , kadi je i on na sliki. Šal je nazad priko VEZE va Taliju.  Kada je pal zrakoplov na komunadu kraj Veloga vrha. Su u nas kući, pod jaku stražu , ku je vodil Pere Orlić  Loretin, operirali trih piloti. Jimili su prekinjene, noge i jedan ruku. Amputirali su jin prekinjeno. Potlik su Partizani se pobrali va šatorsko krilo i to nikamo zakopali. Oni su zi VEZU, si skupa, zi Jingleškimi kirurgi šli va Taliju. Jenoga pilota su zi Garice pejali zi kajićen priko Dunata na VEZU. Potlik je njegov sin prišal vidit, kadi su mu spasili oca. Udelali su Spomen ploču na Dunatu. Na Dunatu je bila udelana prva diverzija jako brzo , nakon okupacije. Tamo su ubili talijanskoga stražara.  Od 300 puntarskih partizani jih je jako čudo poginulo.  Skoro 30% .Skoro saki dan je zvonilo. Rekli bi bil poginul je ta i ta. BOG GA POMILUJ! Po ratu je za sih bila udelana misa va našoj crikvi. Kraj prazne škrinje je bila partizanska straža.  Tako smo zaplavali va oslobojenje.